Casares: “Os impostos aos beneficios caídos do ceo no sector da enerxía son necesarios e xustos. A beneficios extraordinarios, xustiza social”

Xullo 6, 2022

O eurodeputado avogou pola redistribución dos beneficios extraordinarios de forma que compensen parcialmente as facturas máis elevadas dos consumidores

En marzo, a Axencia Internacional da Enerxía estimaba que os beneficios extraordinarios ascenderían a 200.000 millóns de euros este ano só na Unión Europea. A Axencia explicaba como esta ganancia excepcional obedece ao deseño do mercado actual e aos altos prezos do gas na UE que elevan os prezos da electricidade. Sobre esta cuestión, debatíase esta tarde no Pleno do Parlamento Europeo.

Desde o Grupo da Alianza de Socialistas e Demócratas, o eurodeputado Nicolás González Casares lembrou como levan reclamando desde hai un ano medidas que fagan fronte á subida dos prezos da enerxía, entre as que figura a proposta de reconducir os beneficios extraordinarios. “Os impostos aos beneficios caídos do ceo son necesarios e xustos. A situacións extraordinarias, medidas extraordinarias. A beneficios extraordinarios, xustiza social”, demandou González Casares.

O socialista falou da necesidade de réximes fiscais útiles para os beneficios inesperados que mitiguen as consecuencias sociais e económicas do aumento dos prezos da enerxía, exacerbado pola guerra en Ucraína. “Se hai beneficios caídos do ceo é que algo falla no mercado. Se non podemos intervilo e reformalo xa nesta situación tan complexa, polo menos temos que evitar que o diñeiro de millóns de cidadáns que sofren a durísima suba de prezos se acumule nas mans dos mandatarios das enerxéticas”, denunciou.

González Casares avogou pola redistribución dos beneficios extraordinarios de forma que compensen parcialmente as facturas máis elevadas dos consumidores: “É unha cuestión de xustiza social urxente”. Ademais, o eurodeputado apuntou a necesidade dunha reforma estrutural do deseño do mercado eléctrico de forma que reflicta correctamente os baixos custos das enerxías renovables.

Artículos relacionados

COP27: Non deixes para mañá…

COP27: Non deixes para mañá…

Rematou a COP27 na turística Sharm el Sheikj en Exipto e é hora de facer balance dunha COP que só pasará á historia...