O eurodeputado propón cooperar en renovables e hidróxeno verde e advirte que a transición enerxética debe ser tamén socialmente equitativa
O eurodeputado Nicolás González Casares fixo un chamamento desde Colombia para reforzar os lazos enerxéticos entre Europa e América Latina, nun contexto global marcado pola crise enerxética e a urxencia climática. Casares participou no 25º Congreso da Asociación Colombiana do Gas (Naturgas), onde defendeu a necesidade de establecer alianzas estratéxicas que impulsen unha transición enerxética xusta, sostible e adaptada ás realidades de cada rexión.
Durante a súa intervención, o europarlamentario socialista compartiu escenario coa presidenta de Naturgas, Luz Stella Murgas, nun diálogo sobre os retos comúns e as oportunidades de cooperación entre ambas as rexións. Na súa análise, Casares abordou a transformación do mercado enerxético europeo tras a invasión rusa de Ucraína, subliñando que "o futuro enerxético de Europa está nas renovables e nos gases verdes", aínda que advertiu que esta transición supón dificultades: "Debemos ser conscientes de que as dificultades actuais tamén supoñen unha perda de competitividade para a nosa industria".
O eurodeputado non deixou pasar a ocasión para reafirmar o compromiso europeo con Ucraína: "Na Unión Europea seguimos firmes no apoio a Ucraína, e quero que en América Latina e neste sector a xente o saiba".
Preguntado pola presidenta de Naturgas sobre se os avances europeos na transición enerxética son extrapolables ao caso colombiano, Casares foi tallante: "Non necesariamente". Ao seu xuízo, cada rexión debe atopar a súa propia vía cara á descarbonización. “Colombia ten gas para o seu consumo interno, o que lle dá autonomía enerxética e pode contribuír a reducir as desigualdades sociais. Debe buscar o seu propio camiño, pero si podemos compartir intereses, especialmente no desenvolvemento de combustibles renovables de maneira sostible”, afirmou.
Neste sentido, destacou o potencial do país suramericano en materia de enerxías renovables, e especialmente o seu papel no desenvolvemento do hidróxeno verde, un vector enerxético en auxe na rexión: “Esa nova xeración de enerxías pode ser a forza dunha Colombia máis limpa e xusta”, sinalou, tomando como referencia os avances de países veciños como Chile.
Casares pechou a súa intervención cunha mensaxe contundente sobre o enfoque social que debe acompañar a transición enerxética: “Non hai xustiza climática sen xustiza social. De nada serve reducir emisións se millóns de persoas non poden quentar as súas casas ou cociñar de forma limpa”.
Durante a súa estancia en Colombia, o eurodeputado mantivo diversos encontros con figuras clave do ámbito político e enerxético, como Catherine Juvinao, congresista do Partido Alianza Verde; Tiffany Bayly, xerente da Sociedade Peruana de Hidrocarburos; Andrea Stegher, presidente da Unión Internacional do Gas; ou Eric Eyberg, director global de consultoría de gas e enerxía de Standard & Poor’s.
