Para o representante socialista determinar a orixe do virus é “crucial para previr e mitigar futuras crises sanitarias”
Un ano despois de que a pandemia da Covid-19 impactase nas nosas vidas, a principios do 2021, a Organización Mundial da Saúde (OMS) convocaba a un grupo de expertos a nivel internacional para desprazarse a Wuhan e rastrexar a orixe do SARS-CoV-2. Nesta primeira investigación, que contou coa participación de científicos chineses, estudáronse catro posibles causas. O informe final estableceu a propagación do virus de morcegos a humanos, posiblemente a través doutras especies, como a máis probable.
Aínda que esta primeira misión tiña como obxectivo asentar os piares do estudo, coa segunda búscase obter unhas conclusións máis concretas. Ante as dúbidas xeradas esta semana ao redor da continuidade da OMS coas investigacións ante o receo de China, desde o Parlamento Europeo, o eurodeputado Nicolás González Casares diríxese á Comisión Europea. O socialista reclama ao organismo que se informe sobre esta situación que podería entorpecer enormemente o coñecemento desta e futuras pandemias. Tamén en pregunta parlamentaria, Casares pídelle á Comisión que aclare a súa postura respecto diso.
“Determinar a orixe e a serie de acontecementos que levaron a este virus para infectar ao ser humano e transmitirse entre individuos ata acabar xerando unha pandemia é dunha importancia crucial para previr e mitigar futuras crises sanitarias“, insiste González Casares.
Máis de seis millóns de persoas faleceron por Covid-19 en todo o mundo, segundo os rexistros oficiais da OMS, que recoñece que a cifra real é superior.
