O Pleno do Parlamento Europeo referenda por 366 votos a favor e 186 en contra o mandato aprobado na Comisión de Industria e Enerxía para entrar en negociacións interinstitucionais
O eurodeputado socialista Nicolás González Casares sinalou que a votación de hoxe “permitirá aprobar a Reforma do Mercado Eléctrico antes do final da lexislatura europea”. O Pleno do Parlamento Europeo referenda por 366 votos a favor e 186 en contra o mandato aprobado na Comisión de Industria e Enerxía para entrar en negociacións interinstitucionais co Consello e a Comisión Europea e aprobar “unha reforma urxente que reforza a protección dos consumidores e establecer novos dereitos”.
“Traballamos máis rápido que o Consello. Con este voto o Parlamento demostrou que sabe traballar con axilidade e adoptar posicións en temas críticos a velocidade récord. A partir de agora non poderán xustificar deixar da Eurocámara con regulamentos de emerxencia”, dixo González Casares, que é relator do Parlamento para esta reforma.
O eurodeputado defendeu que este acordo “contén respostas ás demandas cidadás expresadas durante a crise enerxética: reforzo da protección dos consumidores, novos dereitos, como o dereito para compartir a enerxía, unha mellor regulación dos instrumentos de financiamento e contratación, como os contratos por diferenzas ou os contratos de compravenda de electricidade (PPA), e un impulso ao desenvolvemento de redes eléctricas”.
Ademais, González Casares subliñou que co acordo “comprometémonos a reducir a volatilidade dos prezos da electricidade, reducir as facturas dos cidadáns e a industria e impulsar un sistema eléctrico descarbonizado”.
