O sector contará con novas ferramentas e unha maior adaptabilidade para garantir o cumprimento da Política Pesqueira Común
O Pleno do Parlamento Europeo deu este martes un paso histórico ao aprobar, cun sólido respaldo de 438 votos a favor, 146 en contra e 40 abstencións, un acordo sobre a reforma do réxime de control da pesca da Unión Europea, tras cinco anos de intensas negociacións. Esta vitoria foi acollida con gran satisfacción pola bancada socialista. A eurodeputada Clara Aguilera, portavoz socialista da Comisión de Pesca e relatora do informe, cualifícao como “o expediente máis importante da Comisión de Pesca na actual lexislatura 2019-2024”.
A reforma, que aglutina seis regulamentos, é un fito significativo para o sector pesqueiro europeo. O actual réxime de control pesqueiro concibiuse antes da reforma da Política Pesqueira Común (PPC) en 2013 e non estaba completamente aliñado coas novas normas. Como sinalou o eurodeputado Nicolás González Casares, o regulamento ofrece “solucións pragmáticas” a cuestións tan complexas como os sistemas de vixilancia remota, o diario de pesca (con importantes exencións para a frota de pequena escala) ou as marxes de tolerancia cero para o marisqueo a pé, “onde se atopou un acordo para evitar afectar unha actividade crucial para a miña terra, Galicia”. “Mellórase o control da actividade sen introducir dificultades innecesarias para o seu exercicio”, engadiu á vez que recoñeceu o traballo de Aguilera e o seu equipo.
A implantación de normativas sobre o control pesqueiro e sancións homoxéneas para toda a Unión Europea é crucial para garantir o cumprimento efectivo, uniforme e actualizado da PPC, promover a sustentabilidade dos recursos mariños e evitar “un sentimento de inxustiza entre os pescadores dos distintos Estados membros”, explicou a relatora socialista.
A reforma tamén apunta a modernizar a industria pesqueira mediante a implementación de novas tecnoloxías para enfrontar desafíos como a obrigación de desembarque, a trazabilidade da cadea alimentaria, a inclusión da pesca recreativa nos controis e a dixitalización do sector. Así, para garantir o cumprimento da obrigación de desembarque, requírese que os buques da UE de 18 metros ou máis conten con sistemas de vixilancia electrónica remota a bordo. O informe tamén establece a obrigación de que os capitáns notifiquen as capturas a través do caderno diario de pesca electrónico, independentemente do tamaño da embarcación.
O texto aprobado este martes polo Parlamento propón dar un tempo suficiente (4 anos) ao sector para adaptarse ás novas medidas. Esta reforma representa un paso significativo cara a unha xestión máis eficaz e sostible dos recursos mariños da Unión Europea.
