O eurodeputado destaca que Bruxelas mantén o mercado do carbono como eixo da competitividade europea e reclama reforzar as renovables para cumprir os obxectivos de electrificación
O eurodeputado socialista Nicolás González Casares sinala que a flexibilización da traxectoria para reducir emisións, baixando do 4,4% actual ata o 3.7% para o período 2031-2035, "non é unha boa noticia, pero recoñécese o papel fundamental do mercado do carbono para a arquitectura económica europea".
"Dobrar a electrificación é positivo para 2040, pero o importante é seguir avanzando cara a un sistema eléctrico cada vez máis descarbonizado; por tanto, as renovables serán esenciais", engadiu o deputado galego.
Casares valorou o novo paquete presentado pola Comisión Europea sobre competitividade e descarbonización, que inclúe a revisión do réxime europeo de comercio de dereitos de emisión (ETS) e o novo Plan de Acción para a Electrificación. Para Casares, "a Comisión entendeu que a descarbonización segue sendo un elemento central para o futuro económico de Europa e non un obstáculo para a súa competitividade".
O representante galego na Cámara europea recoñeceu que a flexibilización dalgúns criterios do ETS "non é unha boa noticia", aínda que considera que a mensaxe política que lanza a Comisión é clara. "Europa mantén o mercado do carbono como unha das pezas fundamentais da súa arquitectura económica e climática. O ETS segue sendo o principal instrumento para incentivar a descarbonización da industria e orientar o investimento cara a tecnoloxías limpas", sinalou.
Casares lembrou que a dependencia europea dos combustibles fósiles importados continúa sendo un dos principais factores que debilitan a competitividade da economía europea e expóñena ás tensións xeopolíticas. "A mellor política industrial para Europa pasa por consumir menos combustibles fósiles e máis electricidade renovable producida en casa. Iso reduce custos, aumenta a nosa autonomía estratéxica e xera novas oportunidades para a industria europea", explicou.
Neste sentido, o eurodeputado celebrou que a Comisión sitúe a electrificación como unha prioridade estratéxica e fixe o obxectivo de alcanzar un 46% de electrificación no consumo final de enerxía de aquí a 2040. "Aínda que se trate dun obxectivo indicativo, é unha dirección correcta. Electrificar significa substituír combustibles fósiles por electricidade limpa no transporte, a industria e os edificios. Pero este obxectivo debe ir acompañado dun despregamento moito máis ambicioso das enerxías renovables, do almacenamento e das redes eléctricas máis alá de 2030. Non basta con consumir máis electricidade; esa electricidade debe ser cada vez máis limpa e de orixe europea”, afirmou.
Casares tamén valorou positivamente o obxectivo de alcanzar 200 GW de almacenamento enerxético en 2030 e o anuncio dunha eliminación progresiva das subvencións aos combustibles fósiles. Ao seu xuízo, ambas as medidas "son coherentes cunha transición enerxética que permita reducir as facturas enerxéticas, reforzar a seguridade de subministración e mellorar a competitividade da industria europea".
Non obstante, o eurodeputado lamentou que a proposta final rebaixase algunhas das ambicións que figuraban nos primeiros borradores do Plan de Acción para a Electrificación. Entre elas, a desaparición do obxectivo de incorporar 100 GW adicionais de renovables cada ano ata 2030 e a redución dos obxectivos de despregamento de bombas de calor, incluído en edificios públicos "Se queremos electrificar a nosa economía, necesitamos acelerar tamén a xeración renovable. Son dúas caras da mesma moeda", advertiu.
Ademais, destacou que a proposta do novo Plan de Acción para a Electrificación “recoñece a necesidade de que o despregamento de centros de datos sexa máis sostible, aínda que non o suficiente” botando en falta medidas como criterios de adicionalidade renovable e achega de flexibilidade ao sistema por parte de novos centros de datos. Tamén valora con certa cautela as medidas incorporadas na proposta lexislativa sobre tarifas de rede que acompaña ao paquete e que establece directrices con criterios que eviten o acaparamento e a especulación de acceso á rede e a posible incorporación por parte dos Estados membro de réximes de tarifas especiais para centros de datos que reflictan proporcionalmente o seu impacto no custo da rede.
Para rematar, Casares insistiu en que a prioridade agora debe ser aplicar plenamente a lexislación xa aprobada durante a pasada lexislatura, especialmente a Directiva de Enerxías Renovables (REDE III), para acelerar a descarbonización e consolidar o liderado industrial europeo. "A transición enerxética non é un custo para Europa; é a súa maior oportunidade económica, industrial e xeopolítica", concluíu.
