O eurodeputado galego conversou co estudantado sobre os valores europeos e destacou o impacto dos proxectos financiados pola UE na cidade
En conmemoración do Día de Europa, o eurodeputado galego Nicolás González Casares visitou o CPR Plurilingüe Divino Mestre de Lugo para conversar co alumnado sobre o presente e o futuro da Unión Europea, destacando o legado da Declaración Schuman na promoción da paz e a democracia. “A Declaración Schuman foi un fito fundamental na historia europea, sentando as bases para unha cooperación política que promoveu a estabilidade e o progreso no noso continente”, expresou o eurodeputado durante a súa intervención.
Así mesmo, González Casares resaltou a importancia dos valores europeos compartidos polo CPR Plurilingüe Divino Mestre, unha das dez Escolas Embaixadoras galegas do Parlamento Europeo. “É fundamental que as novas xeracións comprendan e aprecien os principios que sustentan a UE, como a solidariedade, a diversidade e o respecto polos dereitos humanos”, engadiu.
Durante o encontro, o eurodeputado tamén fixo referencia ás accións impulsadas polo Concello de Lugo co apoio dos fondos europeos. Entre elas atópase a conservación do casco histórico, a integración do río Miño na cidade a través do barrio do Carme, a modernización da xestión e a mellora da eficiencia do ciclo integral da auga ou a recuperación da Fábrica da Luz como centro de enogastronomía.
“Estas iniciativas son un bo exemplo do impacto positivo que ten a Unión Europea na vida cotiá dos cidadáns e cidadás de Lugo. É importante seguir traballando xuntos para construír un futuro próspero e sostible”, concluíu o candidato galego do PSOE nas eleccións europeas do vindeiro 9 de xuño.
